Af fundum ....

Skýrsla stjórnar 2008 (pdf)

Ársfundur deildar íslenska fjárhundsins
Mánudagur 6. apríl 2009

Fundurinn var haldinn í sal Sjálfstæðisfélagsins í Grafarvogi, Hverafold 1-3. Guðni Ágústsson formaður setti fundinn kl. 20:00 en í ár á DÍF 30 ára afmæli. Hann stakk upp á Hrund Hjaltadóttur sem fundarstjóra og Þorsteini Thorsteinson sem ritara og var það samþykkt.

Dagskrá fundarins:

1. Skýrsla stjórnar, Guðni Ágústsson formaður
2. Ársreikningar DÍF, Elís E. Stefánsson gjaldkeri
3. Stjórnarkjör
4. Önnur mál

1. Skýrsla stjórnar
Guðni Ágústsson formaður tók til máls og las skýrslu stjórnar en skýrslan fylgir fundargerðinni.

2. Ársreikningar deildarinnar
Elís E. Stefánsson gjaldkeri fór yfir reikninga deildarinnar og fylgja þeir einnig fundargerðinni. Reikningarnir voru síðan boðnir upp til samþykktar og voru samþykktir samhljóða.

Fundarstjóri opnaði fyrir spurningar um skýrslu stjórnar.

Guðríður Þ. Valgeirsdóttir tók undir orð Guðna og þakkaði meðstjórnendum fyrir samvinnuna. Hún er tengliður stjórnar HRFÍ og situr alla stjórnarfundi DÍF. Mikil vinna fylgir því að sitja í stjórn DÍF og þakkaði hún stjórnarmönnum DÍF fyrir hönd stjórnar HRFÍ það sem þeir leggja að mörkum fyrir þjóðarhundinn okkar. Hún nefndi einnig heimasíðu deildarinnar og að þar megi finna niðurstöður heilbrigðisskoðana hjá íslenska fjárhundinum sem rætt hefur verið að taka einnig upp í öðrum deildum. Guðríður þakkaði einnig Önnu Erlendsdóttur, eiginkonu Guðna, fyrir gestrisni en stjórnarfundir DÍF hafa verið haldnir á heimili þeirra hjóna.

Hrund Hjaltadóttir fundarstjóri þakkaði einnig stjórnarmönnum fyrir þeirra framlag og tók undir orð Guðríðar.

3. Stjórnarkjör
Í stjórn DÍF sitja 5 manns auk fulltrúa HRFÍ en í ár gengu tveir úr stjórn, Guðni Ágústsson og Elís E. Stefánsson, sem báðir gáfu kost á sér áfram. Leitað var eftir mótframboðum sem engin voru og voru Guðni og Elís því sjálfkjörnir með lófaklappi.

Í tilefni afmælis deildarinnar var boðið upp á tertu í kaffihléi með áletruninni DÍF 30 ára.

4. Önnur mál
Guðni þakkaði fundargestum fyrir traustið sem honum og Elísi er sýnt og þakkaði fyrir hlý orð frá Guðríði og Hrund. Það vantar áhugasama aðila í göngunefnd deildarinnar sem og fólk sem er tilbúið að vinna í deildarbás á sýningum HRFÍ. Guðni auglýsti því bæði eftir fólki í göngunefnd og básanefnd og nefndi einnig skemmtinefnd ef einhver áhugasamur vill byrja aftur með þannig nefnd fyrir DÍF.

Albert Steingrímsson hundaþjálfari kynnti sporaleit fyrir fundargestum. Hann sagði íslenska fjárhundinn henta mjög vel til slíkra starfa en boðið hefur verið upp á sporanámskeið á Íslandi síðan 1995, öll árin hefur verið töluverð þátttaka og þónokkuð af íslenskum fjárhundum. Af hundum sem hafa náð góðum árangri sagði Albert einn vera í fersku minni, íslenska fjárhundinn Kirkjufells Kappa. Eftir þriggja daga námskeið með þann hund kvaðst Albert geta fullyrt að hann gæti slegið margar vinnuhundategundir út! Sporaleit gengur út á það að láta hund finna sporaslóð. Hann þarf að rekja slóðina í rétta átt, markera hluti sem lagðir eru í slóðina á leiðinni og láta stjórnanda vita. Allt þetta gerist í gegnum leik. Ef hundur er viljugur til að leika þá sagði Albert að ekkert mál væri að æfa sporaleit. Það er eitt sérlega gott við þetta sport, þetta er hægt að gera einn! Inn á námskeið komast hundar frá 10 mánaða aldri. Þetta hentar þetta öllum en fyrst og fremst er verið að nýta meðfætta eiginleika hundsins. Allir hundar sem hafa langt nef eru að sögn Alberts góðar í leit með nefi en erfiðara er að þjálfa hundategundir með klesst nef. Retriever hundar hafa skilað mjög góðri vinnu, einnig spaniel hundar, schnauzer eru að koma sterkir inn og líka þýskur fjárhundur. Albert sagði ennfremur að eini hundurinn sem hefur farið í gegnum próf í sporaleit hér á landi með fullt hús stiga væri border terrier.

Guðríður bað Albert að segja frá hlutaleit líka. Þá er hundurinn hafður laus á svæði sem er stikað út, 50 x 50 m og markmiðið er að hundurinn finni 3-5 hluti á sem skemmstum tíma. Þessir hlutir geta verið allt frá pennaloki yfir í teskeið og hundarnir verða að læra að leita skipulega sem Albert segir að þeir geri mjög fljótt.

Námskeið sem þessi eru ávallt einstaklingsbundin, þ.e. æfingar eru miðaðar að getu hvers og eins. Albert nefndi einnig að gaman væri að sjá íslenskan fjárhund keppa í hlýðni og þá sagðist hann ekki vera að tala um brons. Hann sagði íslenska fjárhundinn geta keppt við border collie í hraða í hlýðniæfingum og að fáar aðrar tegundir mundu slá þeim út.

Albert stakk að lokum upp á að deildin sjálf mundi halda einhverskonar próf, t.d. hlutaleit eða bronspróf, og hvatti hann fundargesti til að prufa svona þjálfun og virkja hundna sína!

Jón Magússon sagði frá old english sheepdog hundi með lélegar mjaðmir og hve hræðileg lífsreynsla það væri fyrir eiganda. Hann benti á að dæmi eru um aðrar deildin innan HRFÍ sem hafa bannað ræktun frá hundum með D og E mjaðmir og lagði til að DÍF færi að þeirra fordæmi. Jón sagðist ekki skilja af hverju verið væri að taka mjaðmamyndir ef ekki væri bannað að rækta frá hundum með svo slæmar mjaðmir.

Guðríður benti á að í gegnum tíðina hafi oft verið sagt að íslenskir fjárhundar hafi ekki klínísk einkenni mjaðmaloss en í dag séu þekkt dæmi um slíkt. Guðríði finnst að þetta eigi að vera ákvörðun hvers ræktanda fyrir sig og bað hún fólk að íhuga vandlega hvað það væri að samþykkja.

Guðni kvaðst ekki þekkja dæmi þess að aflífa hafi þurft íslenska hunda út af mjaðmalosi en sagðist skilja hvað Jón væri að fara. Hann vildi höfða til skynsemi ræktenda, væri ekki hlynntur boðum og bönnum.

Þorsteinn Thorsteinson sagði frá íslenskri tík sem hann á sjálfur og er með E-mjaðmir, klínískt mjaðmalos og þolir ekki neina hreyfingu sem heitir. Hann tók undir orð bæði Guðna og Guðríðar og hvatti fólk til að fara varlega því stofninn sé svo viðkvæmur. Hann nefndi að deildin ætti að taka upp skýra ræktunarstefnu þar sem m.a. væri sagt að hunda með D og E mjaðmir ætti ekki að nota til ræktunar. Þetta væri þó einungis ræktunarstefna og ef ræktandi kysi svo þá gæti hann eftir sem áður ræktað frá sínu dýri óháð mjaðmaniðurstöðu. En ef ræktunarstefnan væri skýr væri hins vegar spurningarmerki hvort deildin eigi að benda á og auglýsa got undan hundum með D eða E mjaðmir.

Elís ræðir um að myndað hafi verið til mjaðmaloss allt frá árinu 1994 og það hafi í raun verið ræktað m.t.t. þess allar götur síðan.

Eftirfarandi tillaga Jóns Magnússonar er borin upp til atkvæðagreiðslu:
“Tillaga um bann við ræktun D og E mjaðma fyrir aðalfund DÍF. Jón Magnússon”
Tillagan borin upp til atkvæðagreiðslu, tillagan fellt með 16 atkvæðum gegn 7.

Haukur Birgisson sagði sorglegt að fólk í DÍF hafi ekki metnað fyrir þessu.

Unnur Sveinsdóttir spurði af hverju fundarboð ársfundar hefði ekki verið sent í pósti til félaga í DÍF. Hún sagði það kosta 13.000-15.000 kr. og finnst henni það vera réttindi félagsmanna að fá þetta sent í pósti eða þá með póstlista.
Hrund tók undir þetta og Guðni upplýsti að til standi að virkja póstlista deildarinnar.

Fundarstjóri spyrði hvort fundargestir hefðu velt deildarbás og eða göngunefnd fyrir sér og Brynhildur Inga Einarsdóttir kvaðst reiðubúin til að vinna í bás deildarinnar á sýningum.

Guðni upplýsti að póstlisti DÍF sé til, einungis sé eftir að setja hann upp. Hann hvatti fólk til að vinna fyrir deildina, þakkaði Hrund fyrir góða fundarstjórn og sagði fundi slitið.

Fundi slitið kl. 21:41

Stjórnarfundur deildar íslenska fjárhundsins
Þriðjudagur 18. ágúst 2009 kl. 21:00

Allir stjórnarmenn mættir

Dagskrá fundarins: 

1. Stjórn skiptir með sér verkum
Ákveðið að hafa óbreytta hlutverkaskipan innan stjórnar. 

2. Ræktunarmarkmiðið
Stjórn DÍF lýsir vonbrigðum sínum með vinnubrögð HRFÍ varðandi ræktunarmarkmiðið, að stjórn DÍF hafi ekki fengið tækifæri til þátttöku í vinnufundum vegna þessa máls. Stjórnin lýsir jafnframt ánægju sinni með að Sigríður Pétursdóttir skuli nú taka þátt í þessari vinnu. 

3. Afmælissýningin - bikarar
Ákveðið að DÍF kaupi bikara fyrir besta hund tegundar og besta hund tegundar af gagnstæðu kyni báða sýningardagana. 

4. Afmælishátíðin - fólk og hundar
Hætt var við deildarbása á afmælissýningunni vegna dræmar þátttöku. Fimmtudaginn 27. ág´sut, kl. 17-22, verður kynning og mun deildin taka þátt. Tveir íslenskir fjárhundar þurfa að vera á staðnum allan tímann. 

5. Veggspjöldin
Veggspjald Bændasamtakanna er komið út en á veggspjaldinu eru 27 myndir af íslenskum fjárhundum. Bændasamtökin kjósa helst að deildin sjái um smásölu veggspjaldsins og getur deildin keypt veggspjaldið á prentverði og selt með hagnaði, á sama verði og veggspjaldið er selt á hjá Bændasamtökunum. Guðni býðst til að selja veggspjöldin fyrir deildina í Hljóðfæraversluninni Rín. Ákveðið að deildin kaupi 100 stk. af hvorri stærð. 

6. ISIC ráðstefnan
DÍF fékk gott tilboð í gistingu á hóteli í Síðumúla fyrir ISIC ráðstefnuna en ISIC/c hefur ekki enn svarað. 

7. Ný rannsókn, Pieter og fl. 
Guðni upplýsir að ný rannsókn Pieter Oliehoek byggi á sömu gögnum og rannsókn hans árið 1999 en með nýrri tækni. Guðni bendir á að gagnlegra hefði verið að vita hvað hefði breyst síðan 1999. 

8. Deildarsýning
Ákveðið að sækja um deildarsýningu til HRFÍ en sú hugmynd er uppi að kanna hvort leyfi fáist til að halda deildarsýningu á föstudagskvöldi fyrir vorsýningu HRFÍ 2010, þ.e. í lok febrúar. Keppni ungra sýnenda fer fram þetta kvöld og því verður fólk í höllinni en meirihluti svæðisins annars ónotaður. 

9. Rakkalistinn
Ákveðið að setja lista yfir rakka með gilda augnskoðun (heilbrigð augu) og A, B eða C mjaðmir inn á heimasíðu deildarinnar. Samþykkt að bíða þar til eftir næstu augnskoðun sem verður um næstu helgi. 

10. Undanþáguskráning v/íslenskrar tíkar
Farið er fram á að íslenskt tík undan U-skráðum hundi og ættbókfæri tík verði dæmt inn í ættbók. Guðni mun athuga hvort mögulegt verði að dæma tíkina nk. sunnudag, eftir afmælissýningu HRFÍ.

11. Myndband HRFÍ um íslenska fjárhundinn
Guðni gat komið því til leiðar fyrir HRFÍ að myndbandið um íslenska fjárhundinn kemur út á DVD næstkomandi fimmtudag. 

Fundi slitið kl. 23:00

Stjórnarfundur deildar íslenska fjárhundsins
Fimmtudagur 17. september 2009 kl. 20:00

Allir stjórnarmenn mættir

Dagskrá fundarins: 

1. Deildarsýning - bréf frá HRFÍ
Stjórn HRFÍ hefur neitað DÍF um leyfi fyrir deildarsýningu á árinu 2010, jafnvel þó raunhæf fjárhagsáætlun hafi sýnt fram á umtalsverðan hagnað sem n.b. hefði runnið beint í sjóði HRFÍ. Rök félagsins fyrir neitun voru að búið væri að skipuleggja 4 HRFÍ sýningar árið 2010 og félagið hafi lagt út í umtalsverðar fjárhagslegar skuldbindingar því tengdu og með það í huga og efnahagsspár var deildinni neitað! Einnig var tekið fram að tryggja yrði næga þátttöku á sýningum HRFÍ.

Stjórn DÍF hafnar algjörlega þessum rökum en reynsla undanfarinna ára hefur sýnt að deildarsýningar taka ekkert frá sýningum HRFÍ og efnahagsástandið virðist ekki stoppa fólk í að skrá hunda sína á hundasýningar. Fyrir einungis örfáum árum þótti gott ef 200 hundar væru sýndir á sýningum HRFÍ en nú eru sýndir á bilinu 600-800 hundar á hverri sýningu og ljóst að ef sýningarnar eru rétt skipulagðar séu þær umtalsverð tekjulind fyrir félagið. Að sjálfsögðu sýna fleiri á deildarsýningu þar sem sérfræðingur dæmir tegundina og vitað er fyrirfram hvaða dómari mun dæma andstætt sýningum HRFÍ þar sem ekki er gefið upp fyrirfram hvaða dómari dæmir hvaða tegund. 

DÍF hefur haldið deildarsýningar því sem næst árlega í fjölda ára og þar fengið tækifæri til að fá sérfræðinga til að dæma tegundina. Á sýningum HRFÍ dæma íslenska fjárhundinn oft "allrounder" dómarar sem sumir hverjir þekkja íslenska fjárhundinn lítið, jafnvel þó þeir hafi réttindi til að dæma tegundina. Kjarni sýnenda sýnir ennfremur á öllum sýningum og því ljóst að deildarsýning hjá DÍF myndi ekkert taka frá HRFÍ heldur einungis efla starf innan DÍF og bæta við og auka starf innan félagsins. 

Samþykkt að senda bréf til HRFÍ vegna þessa máls og taka málið upp á fulltrúaráðsfundi ef þurfa þykir. Fyrst ekki fékkst leyfi fyrir deildarsýningu á föstudagskvöldi fyrir vorsýningu HRFÍ er áhugi innan DÍF á útisýningu sumarið 2009. Ef svo ólíklega færi að halli yrði á deildarsýningunni þá er deildin reiðubúin að greiða HRFÍ það sem vantaði upp á svo sýningin komi út á sléttu. 

2. Haustsýning HRFÍ - 750 hundar skráðir! Deildarbás? DÍF á að útvega 3 (leggja teppi og taka af), 4 (í vinnu yfir helgina hvorn dag, dyragæsla ofl.), auglýsa eftir fólki, nota póstlistann
DÍF ætlar að vera með deildarbás á haustsýningu HRFÍ. Ákveðið að auglýsa á heimasíðu deildarinnar eftir fólki í deildarbás og í vinnu á sýningunni. Jafnframt á að nota póstlistann og Facebook. 

3. Dagatalsmyndir og dagatalsauglýsingar - auglýsa á dif.is
Auglýsa á eftir myndum á heimasíðu deildarinnar og póstlistanum. 
Prentkostnaður hefur hækkað og því þarf að hækka verð á auglýsingum. Ákveðið að verð á auglýsingu verði 66.000 kr. fyrir heila auglýsingu og 33.000 fyrir hálfa auglýsingu. 

4. Göngunefnd
Hrönn Ægisdóttir hefur boðist til að skipuleggja sunnudagsgöngur í vetur. 

5. Bréf frá HRFÍ v/FCI
FCI vinnur að bók, "Book of the Centenary", til að fagna 100 ára afmæli sínu. Þeir óska myndir af íslenskum fjárhundi og önnur skjöl, myndir eða annað sem sýnir fram á samstarf og sögu HRFÍ innan FCI og vísaði HRFÍ erindinu til DÍF. DÍF hefur engin gögn í höndum varðandi sögu HRFÍ í FCI og samskipti þar á milli og er þessum hluta erindisins því vísað aftur til HRFÍ. Það er hins vegar sjálfsagt að finna góða mynd/myndir sem gætu hentað. 

6. Bréf frá Stefáni Arnarsyni vegna augnskoðana
Stefán er tengiliður Siberian Husky og spyr út í aðgerðir DÍF vegna starblindu í stofninum en starblinda hefur einnig fundist í stofni Siberian Husky. 

7. Rakkalistinn - þarf að komast á netið sem fyrst
Helga vinnur að listanum. 

8. Skotta, U-skráning - var skoðuð á síðustu sýningu og fékk Excellent. Næstu skref? 
Eftir afmælissýningu HRFÍ dæmdu Guðrún Guðjohnsen, Sigríður Pétursdóttir og Kari Järvivnen íslensku tíkina Skottu. Skotta fékk Excellent hjá dómurunum en hún er undan ættbókfærðri tík og U-skráðum hundi. Skotta er 3. kynslóð sem dæmd er inn og getur því nú fengið fullgilda ættbók frá HRFÍ, ef allir pappírar eru til staðar. 

9. ISIC-ráðstefnan á Íslandi 29. október - 1. nóvember. Þurfum að byrja á skýrslunni sem fyrst
Ráðstefnan verður haldin í Reykjavík, á skrifstofu HRFÍ. 
Byrja þarf á skýrslu DÍF sem fyrst og taka Helga og Þorsteinn það að sér. 

10. Myndir af stjórn
Ágúst leggur til að á heimasíðu deildarinnar verði settar inn myndir af stjórnarmönnum DÍF og er það samþykkt. 

Fundi slitið 22:40 

Stjórnarfundur deildar íslenska fjárhundsins
Miðvikudagur 3. febrúar 2010 kl. 20:00

Mættir: Guðni Ágústsson, Þorsteinn Thorsteinson, Elís E. Stefánsson, Ágúst Ágústsson og Helga Andrésdóttir

Dagskrá fundarins:

1. Nýtt ræktunarmarkmið fyrir íslenska fjárhundinn
HRFÍ hefur sent til DÍF nýja tillögu nefndarinnar sem vinnur að skýringum á ræktunarmarkmiði íslenska fjárhundsins að ræktunarmarkmiði íslenska fjárhundsins. Umræður um málið og það ferli sem HRFÍ virðist hafa kosið að láta þessa vinnu fara í en fulltrúum DÍF var ekki gefinn kostur á að taka þátt í þeirri vinnu sem nefndin hefur unnið ásamt fulltrúum HRFÍ. Stjórnarmenn í DÍF eru gríðarlega vonsviknir yfir þessum vinnubrögðum. Farið skref fyrir skref yfir tillögur nefndarinnar. Ákveðið að senda athugasemdir okkar til stjórnar HRFÍ.

Fundi slitið 23:50

Fundur vegna tillagna að breytingum á ræktunarmarkmiði íslenska fjárhundsins
Miðvikudagur 10. febrúar 2010 kl. 20:00

Mættir: Jóna Th. Viðarsdóttir formaður HRFÍ, Guðríður Valgeirsdóttir varaformaður HRFÍ, Guðrún R. Guðjohnsen, Sigríður Pétursdóttir, Guðni Ágústsson formaður DÍF, Þorsteinn Thorsteinson, Elís E. Stefánsson, Ágúst Ágústsson, Helga Andrésdóttir.

Dagskrá fundarins:

1. Tillaga nefndar sem vinnur að skýringum að ræktunarmarkmiði íslenska fjárhundsins að breyttu ræktunarmarkmiði
Guðríður setur fundinn og nefnir að stjórn DÍF hafi furðað sig á þeim farvegi sem þessi vinna hafi farið í, hún tekur undir það og biðst afsökunar á því sem hefði mátt fara á annan veg. Hún fer yfir ferlið og nefnir að margir hafi komið að vinnunni, m.a. Guðrún Guðjohnsen, Sigríður Pétursdóttir, Kenneth Edh og Hans-Åke Sperne.

Á þessum fundi var farið yfir tillögur nefndarinnar og þær ræddar út frá þeim spurningum og tillögum sem stjórn DÍF sendi.

Fundi slitið 23:17

________________________________________________________________________
Best er að skoða þessar síður í 1024x768 pixels upplausn. Umsjónarmaður vefs.
© 2006-2010 Deild íslenska fjárhundsins. Afritun óheimil án leyfis. Allur réttur áskilin