Af fundum ....

Skýrsla stjórnar 2007
(Word-skjal)

Ársfundur deildar íslenska fjárhundsins
Mánudagur 17. mars 2008

Fundurinn var haldinn í sal Sjálfstæðisfélagsins í Grafarvogi, Hverafold 1-3. Guðni Ágústsson formaður setti fundinn kl. 20:00 og stakk upp á Þorbergi Þorbergssyni sem fundarstjóra og Þorsteini Thorsteinson sem ritara og var það samþykkt. 

Dagskrá fundarins: 

1. Skýrsla stjórnar, Guðni Ágústsson formaður
2. Ársreikningar DÍF, Elís E. Stefánsson gjaldkeri
3. Stjórnarkjör
4. Önnur mál

1. 

Guðni Ágústsson formaður tók til máls og las skýrslu stjórnar og fylgir skýrslan með fundargerðinni. Skýrslan verður sett á heimasíðu deildarinnar. (Smellið hér til að lesa skýrslu stjórnar)

2. 

Elís E. Stefánsson gjaldkeri fór yfir reikninga deildarinnar og fylgja þeir einnig fundargerðinni. Reikningarnir voru síðan bornir upp til samþykktar og samþykktir samhljóða. 

Fundarstjóri opnaði fyrir spurningar um skýrslu stjórnar. 

Stefanía Sigurðardóttir spurði um tengilið stjórna HRFÍ og DÍF sem skipaður er til tveggja ára í senn en núverandi tengliður er Guðríður Þ. Valgeirsdóttir. Stefanía spurði út í stöðuna á þessu máli en nú eru 3 ár síðan tengiliður var fyrst skipaður og reglugerð um starfsemi ræktunardeilda HRFÍ breytt m.t.t. þessa. Guðni upplýsti að á fyrsta stjórnarfundi fráfarandi stjórnar hafi málið verið rætt en þá hafði það ekki verið rætt frekar innan stjórnar HRFÍ. 

Stefanía Sigurðardóttir spurði hvort deildin hafi hugsað sér að sækja um aukið sjálfstæði deildarinnar til stjórnar HRFÍ. Guðni svaraði að þetta hafi ekki verið rætt innan stjórnar deildarinnar. Þorsteinn Þorbergsson upplýsti hvernig lög og reglur HRFÍ hafi þróast í gegnum árin og mótast að fyrirmynd hundaræktarfélaganna á Norðurlöndunum. 

Stefanía Sigurðardóttir spurði út í veggspjald það sem Búnaðarsamband Íslands vinnur að með myndum af íslenskum fjárhundum. Guðni upplýsti að veggspjaldið sé í vinnslu hjá Búnaðarsambandinu. 

3. 

Kosningar til stjórnar. Þetta árið ganga 3 einstaklingar úr stjórn deildarinnar en það eru þau Þorsteinn Thorsteinson ritari, Ágúst Ágústsson meðstjórnandi og Helga Andrésdóttir meðstjórnandi. 

Lýst var eftir framboðum til stjórnar. 

Ágúst Ágústsson, Helga Andrésdóttir og Þorsteinn Thorsteinson gefa kost á sér og eru því sjálfkjörin í stjórn DÍF til næstu 2 ára. 

4. 

Undir liðnum önnur mál tóku eftirfarandi til máls.

Guðni Ágústsson þakkar fyrir stuðning við sitjandi stjórnarmeðlimi. Nefndir innan deildarinnar eru skipaðar af stjórn og spurði Guðni hvort einhver hafi hug á að starfa í nefndum á vegum DÍF. 

María Dóra Þórarinsdóttir var beðin að kynna smalaeðlispróf HRFÍ fyrir fundarmönnum en prófið er miðað að því að sjá vinnueiginleika fjárhunda. Prófið var þýtt frá Ameríku og heitir þar Herding instinct test. Stjórn HRFÍ hefur viðurkennt prófið sem vinnueiginleikapróf fyrir fjárhunda. Þetta er eðliseiginleikapróf og einungis eðlislægir eiginleikar hundsins eru skoðaðir og því þurfa hundar ekki að þekkja fé fyrir prófið. Flestir hundar standast prófið nema þeir séu hættulegir fénu, eru virkilega hræddir eða algjörlega áhugalausir. María Dóra segir að virkilega gaman væri að fá fleiri íslenska fjárhunda í smalaeðlispróf en næsta próf verður væntanlega í haust. 

Umræður og fyrirspurnir úr sal. M.a. var spurt til hvers sé ætlast af hundinum og upplýsir María Dóra að hver og einn hundur sé metinn á eigin grundvelli og hundar þurfa ekkert að kunna fyrir prófið. Einnig var spurt hvort prófdómari þekki íslenska fjárhundinn en María Dóra var prófdómari í fyrstu tveimur prófunum en hún á bæði íslenska fjárhunda og border collie. Þá var spurt hvort eigandi fylgi hundinum í prófinu og er það svo. 

Arna Rúnarsdóttir spurði hvort ekki sé tímabært að íslenski fjárhundurinn þurfi að uppfylla einhverjar kröfur, s.s. smalaeðlispróf eða skapgerðarmat, til að fá íslenskan meistaratitil? Hún spurði jafnframt hvort ekki ætti að reyna að halda sérstakt fjáreðlispróf fyrir íslenskan fjárhund. María Dóra sagðist ekki trúa öðru en að Fjár- og Hjarðhundadeildin mundi bjóða okkur velkomin í smalaeðlispróf. Helga Andrésdóttir velti fyrir sér hvort ekki væri hægt að halda sérstaka prófhelgi með smalaeðlisprófi fyrir íslenska fjárhunda. 

Monika Karlsdóttir spurði hvort til sé einhver æskilegasta niðurstaða á smalaeðlisprófi fyrir íslenska fjárhundinn. María Dóra segir að það sé deildarinnar að gera en til þess þurfi fyrst að skoða fyrst nægjanlegan fjölda hunda. 

Umræður voru um skapgerðarmat og að nauðsynlegt sé að meta fleiri hunda svo hægt verði að sjá hver æskilegasta niðurstaða hundanna verði á matinu. Þorsteinn Thorsteinson upplýstiað innan ISIC sé starfandi nefnd sem mun fara yfir niðurstöður skapgerðarmats en vandamál sé að ekki hafi nægjanlega margir hundar verið metnir hér á landi. Monika Karlsdóttir sagðist frekar vilja að gerði yrði krafa um fjáreðlispróf en skapgerðarmat. 

Þorsteinn Þorbergsson spurði hvort fólki finnist eðlilegt að ræktunarupplýsingar og niðurstöður heilbrigðisskoðana og prófa séu opinberar og taka fundarmenn undir það. 

Linda B. Jónsdóttir sagðist ekki sjá að hinn almenni hundaeigandi muni mæta með hunda sína í fjáreðlispróf, nægjanlega erfitt sé að fá hunda bara í mjaðmamyndatöku og augnskoðun. Hafþór Snæbjörnsson velti því fyrir sér hvort þetta snúist ekki að miklu leiti um kostnað. 

Elís E. Stefánsson sagði að nokkuð væri um ræktendur sem ekki fari að reglum HRFÍ, þeir fá áminningarbréf frá félaginu en síðan gerist ekkert meir. Þorsteinn Þorbergsson, formaður siðanefndar HRFÍ, segir að þeir sem skila inn gotskráningum sem ekki uppfylli grunnskilyrði borgi dýrari ættbók. Við þriðja brot af þessu tagi sé svona málum vísað til siðanefndar en grunnskylda HRFÍ sé að stuðla að heilbrigðri ræktun og gefa út ættbækur. 

Umræður um áheyrnarfulltrúa í stjórn DÍF. Guðni sagði að ekki væri óeðlilegt að HRFÍ hafi sinn fulltrúa í stjórn deildarinnar en leiðin sem farin var að því að skipa fulltrúann hafi ekki verið nægjanlega góð. Hann sagði að þetta ætti jafnvel að vera öfugt, að fulltrúi DÍF sitji fundi hjá stjórn HRFÍ. Arna Rúnarsdóttir sagði að koma verði skýrt fram hjá deildinni að áheyrnarfulltrúinn hafi ekki atkvæðisrétt í stjórn DÍF. Ágúst Ágústsson sagðist ekki sjá þörf á fulltrúa frá stjórn HRFÍ í stjórn DÍF. Fundurinn samþykkti að fela stjórn DÍF að vinna í þessu máli og að reglur varðandi áheyrnarfulltrúann verði skilgreindar betur. 

Stefanía Sigurðardóttir spurði hvernig boðað hafi verið til fundarins. Þorsteinn Þorbergsson sagði að til fundarins hafi verið boðað bæði á heimasíðu DÍF og HRFÍ. Stefanía lagði til að póstlisti deildarinnar verði virkjaður og að ef ekki verði boðað til ársfundar skriflega verði fundarboð sent á póstlista. 

Guðni Ágústsson þakkaði fundarmönnum fyrir ánægjulegan fund og stjórn fyrir ánægjulegt samstarf. 

Fundi slitið kl. 22:12

Formannafundur í ISIC
Geysir 4. – 6. apríl 2008

Þetta var aukafundur sem haldinn var sérstaklega til að fara yfir drög að lögum ISIC. Guðni Ágústsson var fulltrúi DÍF á fundinum og Þorsteinn Thorsteinson var ritari fundarins. 

Fundur með formanni ISAA
Mánudagur 7. apríl 2008 kl. 17:20

Mættir: Guðni Ágústsson, Þorsteinn Thorsteinson, Ágúst Ágústsson, Helga Andrésdóttir og Donna McDermott formaður ISAA í Bandaríkjunum.
Elís E. Stefánsson og Guðríður Þ. Valgeirsdóttir hafa boðað forföll.

Dagskrá:

1. Ræktunarmarkmið íslenska fjárhundsins í USA

Rætt um ræktunarmarkmið íslenska fjárhundsins í USA en Donna McDermott formaður ISAA upplýsti stjórn DÍF á að markmið ISAA sé að finna ræktunarmarkmið fyrir íslenska fjárhundinn í USA sem DÍF, HRFÍ, AKC sem og meðlimir ISAA muni samþykkja og sé það takmark ISAA.

Fundi slitið kl. 19:10

Stjórnarfundur deildar íslenska fjárhundsins
Mánudagur 28. apríl 2008 kl. 20:00

Mættir: Ágúst Ágústsson, Elís E. Stefánsson, Guðni Ágústsson, Helga Andrésdóttir og Þorsteinn Thorsteinson.
Guðríður Þ. Valgeirsdóttir hefur boðað forföll.

Dagskrá:

1. Stjórn skiptir með sér verkum

Guðni leggur til óbreytt hlutverkaskipti innan stjórnar og er það samþykkt.

2. Ræktunarmarkmið íslenska fjárhundsins hjá AKC /ISAA

3. Pörunarbeiðni

Pörunarbeiðni tekin fyrir og afgreidd

4. Áheyrnarfulltrúi HRFÍ í stjórn DÍF

Á ársfundi DÍF var stjórninni falið að hafa samband við HRFÍ vegna áheyrnarfulltrúans og að reglur félagsins varðandi hann verði skilgreindar betur. Umræður eru um málið og hvaða spurninga á að spyrja stjórn HRFÍ varðandi fulltrúann, hvert er t.d. hlutverk hans? Af hverju var reglum félagsins breytt og fulltrúinn upphaflega skipaður? Finnst stjórn HRFÍ þörf á þessum fulltrúa í dag? Á fulltrúinn alltaf að vera stjórnarmaður í HRFÍ? 

Í daglegu starfi finnst stjórn DÍF ekki þörf á að fulltrúi stjórnar HRFÍ sitji í stjórn deildarinnar en stjórn DÍF finnst það þó ekki óeðlilegt að náin tengsl séu milli stjórna HRFÍ og DÍF enda er um að ræða þjóðarhund Íslands, íslenska fjárhundinn. Sjálfsagt mál væri t.d. að hafa þá reglu að senda stjórn HRFÍ fundargerðir eftir hvern stjórnarfund í DÍF. Stjórn DÍF vill taka fram að þessi umræða snúist á engan hátt um sitjandi fulltrúa HRFÍ í stjórn DÍF. 

5. Fulltrúaráðsfundur HRFÍ

Annað kvöld verður fulltrúaráðsfundur hjá HRFÍ. Guðni kemst líklega ekki en Helga getur mætt á fundinn fyrir hönd deildarinnar ef Guðni kemst ekki.

6. Íslenski fjárhundurinn í Vegahandbókinni 2008-2009

Sérstök myndasíða verður í Vegahandbókinni um íslenska fjárhundinn en Búnaðarsamband Íslands sér um síðuna en myndirnar koma allar frá DÍF.

7. Veggspjald Búnaðarsambands Íslands með myndum af íslenska fjárhundinum

Guðni upplýsir að deildin muni fá tækifæri til að fara yfir myndir og myndtexta áður en veggspjaldið verður fullbúið fyrir prentun. Ágúst muni fara yfir skurð á myndum á veggspjaldinu og Helga mun þýða textann yfir á ensku.

Fundi slitið kl. 23:21

Stjórnarfundur deildar íslenska fjárhundsins
Mánudagur 18. ágúst 2008 kl. 20:00

Allir stjórnarmenn mættir

Dagskrá fundarins:

1. ISIC – hætt hefur verið við að halda næstu ISIC ráðstefnu á Íslandi sökum þess að Svíar hafa ekki efni á að koma til Íslands

Ákveðið að senda bréf til ISIC/c og allra aðildarlanda ISIC og lýsa vonbrigðum stjórnar DÍF með þessa afstöðu klúbbsins í Svíþjóð og leggja til að ráðstefnan verði haldin á Íslandi þó sænski klúbburinn hafi e.t.v. ekki tök á að senda fulltrúa. Stjórn DÍF efast um að ferðakostnaður sænska klúbbsins yrði 5 sinnum hærri yrði fundurinn haldinn á Íslandi og bendir á að DÍF hefur ekki fasta innkomu eins og flest aðildarlönd ISIC og því er ferðakostnaður DÍF ávallt mikill sé ráðstefnan haldin í Kaupmannahöfn.

2. Landbúnaðarsýningin á Hellu dagana 22. – 24. ágúst

Sérstök kynning á íslenska fjárhundinum verðum tvívegis bæði laugardag og sunnudag, um 10 mínútur í hvort skipti. Á milli kynninganna verða íslenskir hundar á staðnum svo gestir hátíðarinnar geti skoðað íslenska fjárhundinn í návígi. Reynt verður að hafa á staðnum hunda af sem flestum litum. Ágúst tekur að sér að vera þulur á kynningunni.

3. Heimasíða deildarinnar

Á heimasíðuna vantar ræktunarmarkmið íslenska fjárhundsins á pdf-formi og enska útgáfu ræktunarmarkmiðsins vantar einnig á heimasíðuna. Guðni mun setja ræktunarmarkmiðið á pdf-form og senda Þorsteini.

Rætt um framsetningu heilbrigðiskannana á heimasíðunni og hvaða framsetning sé best. Allar niðurstöður augnskoðana eru birtar á netinu en eins og þetta er gert núna þá er hætta á misskilningi.

Í nokkrum tilvikum hefur starblinda fundist í ungum hundum en þá ekki verið mögulegt að segja til um arfgengi. Flestir þessarra hunda hafa síðar greinst með alheilbrigð augu og á þessi fyrsta niðurstaða þeirra ekkert skylt við arfgenga starblindu (posterior polar cataract). Skýra þarf þetta betur á heilbrigðislistanum og setja athugasemd við fyrstu niðurstöðuna sem þessir hundar fengu.

Á listanum eru hundar sem eiga afkvæmi með staðfesta arfgenga starblindu merktir sem berar fyrir sjúkdóminn og er ákveðið að taka það út.

Á heimasíðuna vantar nánari útlistun á niðurstöðum heilbrigðisskoðana, aldrei má gleyma því hve heilbrigt kynið okkar er!

4. Anterior polar cataract

Fyrr á árinu var íslensk fjárhundstík greind með anterior polar cataract sem er arfgeng tegund starblindu sem veldur hundum þó aldrei nokkrum vandkvæðum. Samkvæmt sérfræðingum er engin ástæða til að útiloka hund með þessa greiningu frá ræktun en samkvæmt núgildandi reglum þá ætti hundur með þessa greiningu að fara í ræktunarbann. Því er nauðsynlegt að skrifa stjórn HRFÍ og biðja um að þessu verði bætt inn í ræktunarreglur sem varða íslenska fjárhundinn. Einnig ákveðið að biðja stjórn HRFÍ að fara þess á leit við sérfræðingana að þegar arfgeng starblinda finnst hjá þá sé sérstaklega tekið fram hvaða gerð starblindu sé um að ræða.

5. Mjóhundadeildin sýnir íslenskan fjárhund

Mjóhundadeildin stendur fyrir gamnikeppni (e. open show) þar sem m.a. verður hægt að sýna íslenskan fjárhund en Sigríður Pétursdóttir mun dæma kynið. Ekki verða gefnar einkunnir og er því ekki um hefðbundna sýningu að ræða. Ekki var haft samráð við DÍF um uppákomuna.

6. Næsta deildarsýning

Rætt um deildarsýningu en sækja þarf fljótlega um ef ætlunin er að halda deildarsýningu hjá DÍF á næsta ári. Rætt um möguleika á deildarsýningu laugardaginn 31. janúar. Rætt um dómara sem mögulega koma til greina.

7. Göngunefnd

Skipa þarf nýja göngunefnd hjá DÍF. Ákveðið að auglýsa eftir áhugasömum á heimasíðu deildarinnar.

Fundi slitið kl. 22:58

Stjórnarfundur deildar íslenska fjárhundsins
Sunnudagur 21. september 2008 kl. 20:00

Allir stjórnarmenn mættir

Dagskrá fundarins:

1. ISIC ráðstefna Danmörku

Sænski klúbburinn hefur sent bréf þar sem útskýrt er af hverju þeir gátu ekki samþykkt að ráðstefnan yrði haldin á Íslandi. Guðni kemst alls ekki frá vegna vinnu. Stungið upp á að Þorsteinn fari á ráðstefnuna sem fulltrúi DÍF og er það samþykkt. Byrja þarf á skýrslu DÍF sem fyrst.

2. DNA rannsókn á arfgenginni starblindu (cataract)

Fulltrúar ISAA hafa sent upplýsingar um rannsóknina. Ágúst veltir fyrir sér hvort e.t.v. sé hægt að nota niðurstöður Dr. Guðbjargar Ástu Ólafsdóttur við þessa nýju rannsókn? Guðni tekur að sér að hafa samband við Guðbjörgu og kanna möguleikann. Augljóslega verður nokkur vinna að safna sýnum en markmið rannsóknarinnar er að finna og kortleggja gen fyrir starblindu hjá íslenska fjárhundinum. Ákveðið að taka þátt í rannsókninni og styðja eftir mætti.

3. Kynningarefni fyrir íslenska fjárhundinn

Guðni segir að vanti upplýsingar- og kynningarefni fyrir íslenska fjárhundinn.

a. Guðni hefur haft samband við fyrirtækið Sólarfilmu. Þeir eru reiðubúnir að gera spilastokk með 54 myndum af íslenskum fjárhundum DÍF að kostnaðarlausu. DÍF fengi í staðinn ca. 200 spilastokka en fyrirtækið mundi eiga útgáfuréttinn og jafnframt selja spilastokka. Allir stjórnarmenn mjög jákvæðir gagnvart hugmyndinni. Ákveðið að fela dagatalsnefnd DÍF að vinna í málinu og velja myndir.

b. Bæklingur. Fyrir nokkrum árum var unnið að gerð kynningarbæklings um íslenska fjárhundinn en þeirri vinnu var slegið á frest þegar vinna að skýringum ræktunarmarkmiðsins hófst. Ákveðið að halda áfram með þessa vinnu en sleppa ræktunarmarkmiðinu úr bæklingnum.

c. Silkudúkur. Elís hefur kannað möguleika á að prenta myndir og texta á silki m.a. til að nota í kynningarbásum á vegum DÍF. Hann sýnir prufu með mynd af íslenskum fjárhundi sem kemur mjög vel út en ekki er mjög kostnaðarsamt fyrir deildina að láta gera svona dúka. Dagatalsnefndin tekur að sér að vinna í málinu og velja myndir sem koma til greina.

d. Dagatalið hefur verið eina kynningarefnið undanfarin ár og verður að sjálfsögðu haldið áfram að gefa það út.

4. Heimasíða deildarinnar

Guðni veltir upp þeirri spurningu hvort auglýsa eigi öll got og eða væntanleg got á heimasíðu deildarinnar? Á t.d. að auglýsa got undan hundum með D eða E mjaðmir? Umræður um málið. Þorsteinn telur að fyrst ekkert er tekið fram í ræktunarstefnu deildarinnar, t.d. um mjaðmalos þá finnist honum að auglýsa eigi öll got sem uppfylli skilyrði HRFÍ um skráningu í ættbók. Áframhaldandi umræður um málið og ákveðið að auglýsa áfram öll got sem uppfylli skilyrði. Einnig ákveðið að auglýsa ekki áformuð eða væntanleg got.

5. Pörunarbeiðni

Pörunarbeiðni tekin fyrir og afgreidd. Reynt er að benda á hunda sem ekki eiga of mörg afkvæmi og þar sem skyldleikastuðull við tíkina er ekki of hár.

Ágúst leggur til að inni á deildarsíðunni verði fólk minnt á að láta HRFÍ vita þegar hundar falla frá.

Eftir er að mynda mjaðmir á nokkrum karlhundum sem hafa gilda augnskoðun. Ákveðið að senda eigendum þeirra bréf og hvetja þá til að láta mynda mjaðmir hunda sinna.

6. Deildarsýning

Fulltrúi sýningarstjórnar HRFÍ stakk upp á þeim möguleika að halda deildarsýningu DÍF í tengslum við afmælissýningu HRFÍ sem stendur til að halda síðsumars á næsta ári. Þá væri m.a. hægt að samnýta dómara. Guðni mun verða í sambandi við sýningarstjórn og þetta verður kannað nánar.

Fundi slitið kl. 23:11.  

Stjórnarfundur deildar íslenska fjárhundsins
Mánudagur 24. nóvember 2008 kl. 20:00

Allir stjórnarmenn mættir

Dagskrá fundarins:

1. ISIC ráðstefnan . 
Þorsteinn segir frá ISIC ráðstefnunni.
Agria í Svíþjóð er búið að gera Health Breed Profile. Íslenski hundurinn hefur sömu sjúkdóma og hundar almennt, þ.e. mjög heilbrigður hundur. Á ráðstefnunni var talað um að reynt yrði að gera sambærilega könnun í hverju landi fyrir sig. Ákveðið að senda fyrirspurn á VísAgría varðandi málið.

Ekki eru til miklir peningar hjá ISIC.

Á ráðstefnunni var samþykkt að gefa ISIC/C leyfi til að ræða um gagnagrunn ISIC við Bændasamtök Íslands.

Talsvart var rætt á ráðstefnunni um “by-laws” fyrir ISIC. Samþykkt var að breyta orðalagi úr “members” í participating clubs” eða “participants” – þetta er samstarf. Líka samþykkt að bæta í lögin að tímarit hvers félags skuli líka send til ISIC/C. Einnig breytt að formannahópurinn ákveði um formlega hluti og fjármál, annars séu ákvarðanir sameiginlegar. Það var ekki tími til að fara yfir lögin í heild sinni og því var samþykkt að mynda nefnd sem ætlar að hittast og fara yfir þetta með ISIC/C. Þessi nefnd mun hittast á Íslandi. Jan Erikson, Svend Brand Jensen eru í nefndinni og líka var stungið upp á Guðna.

Á ráðstefnunni var samþykkt að ISIC/C megi mynda nefndir á þeim sviðum sem þeim finnst nauðsynlegt. Einnig samþykkt að Wilme Roem og Alina Niskanen muni skoða möguleika á póstlista fyrir klúbbana í ISIC.

Allir klúbbarnir samþykktu að þeir vildu sjá fréttabréf frá ISIC, þegar það eru einhverjar fréttir.

Rætt um ræktunarstefnu ISIC en þar er ekkert sem veldur klúbbunum kostnaði eða vandræðum.

Ákveðið að reynt verður að afla peninga svo að nefndin um skapgerðarmat muni geta hist og unnið að óskaprófíl fyrir íslenska hundinn. Á ráðstefnunni stakk Þorsteinn upp á að DÍF muni skrifa HRFÍ og biðja um stuðning þeirra svo þetta verði mögulegt.

Einnig var talað um að ef klúbbarnir hafi hugmyndir um heimasíðu ISIC myndu þeir skrifa Guðna og Wilfred Olsen um það. Einnig að allir klúbbarnir munu skipa tengilið sinn við heimasíðu ISIC. Samþykkt var að ársskýrslurnar muni verða settar á varið svæði á heimasíðu ISIC. Einnig var samþykkt að Donna McDermott muni gera tillögur að formati viðtala við ISIC/C fyrir heimasíðu ISIC og senda til ISIC/C.

Samþykkt var að ISIC/C beri ábyrgð á að það sé ritari og fundarstjóri á ráðstefnum ISIC.

Einnig var samþykkt að skipa nefnd til að halda áfram vinnu að formati fyrir ársskýrslur klúbbanna.

Samþykkt var að hvetja alla klúbba til að þýða ræktunarstefnu ISIC á sitt tungumál. Samþykkt að breyta ekki ræktunaraldrinum í ræktunarstefnunni.

Ræktunarhópar ráðstefnunnar lagði til og var eftirfarandi samþykkt á ráðstefnunni:

1. allir klúbbar verði sér út um nýjustu útgáfu af LatHunden sem fyrst
2. allir klúbbar komi sínum gögnum inn í forritið
3. allir klúbbar komi sínum gögnum inn í gagnagrunn ISIC

Wilfred Olsen var kostinn gjaldkeri ISIC/C til næstu 3 ára. Jan Erikson var kosinn endurskoðandi til næstu 3 ára og Liv Sydhagen til vara til 2 ára.

Næsta ráðstefna á að vera síðustu helgi í október 2009. Rætt var hvort ráðstefnan yrði haldin á Íslandi og hefur DÍF til áramóta til að segja til um hvort hægt sé að halda ráðstefnuna hér. Ef ráðstefnan verður ekki á Íslandi þá verður hún haldin í Finnlandi, ef þeir geta haldið ráðstefnuna á þessum tíma. Annars yrði ráðstefnan haldin í Malmo ef hinir tveir kostirnir verða ekki mögulegir.

Samþykkt af DÍF að stefna á ráðstefnu ISIC á Íslandi 2009 og mun Guðni tala við ISIC/C.

Á ráðstefnunni var einnig rætt um að útbúa lottó/happdrætti til að afla peninga fyrir ISIC.

2. ISAA og þýski klúbburinn Freunde . 
Stjórn DÍF hefur engar athugasemdir við tillögur ISIC.

3. Rannsókn á starblindu í stofni íslenska fjárhundsins
Ákveðið hvaða hunda reynt verður að fá sýni frá og stjórnarmenn skipa með sér verkum í sýnatöku. Fleiri kitt til sýnatöku verða send til DÍF og verður þá reynt að fá sýni frá fleiri hundum.

4. Bréf frá félagsmanni varðandi eineistunga og ræktun
Erindið barst skrifstofu HRFÍ og var sent áfram til DÍF. Vísað í ábyrgð ræktenda á sinni ræktun og reglur HRFÍ.

5. Umsókn um undanþágu frá augnskoðun
Stjórn DÍF hefur ekki vald til að veita undanþágu frá augnskoðunun og ákveðið að vísa í reglur félagsins. Ágúst leggur til að útbúin verði samantekt þar sem fram koma helstu atriði í reglum félagsins sem huga þarf að fyrir ræktun, s.s. gildistíma augnskoðana.

6. Hundaspjall
Umræða um spjallrásir á netinu en það er ekki í verkahring stjórnar DÍF að ritstýra spjallsíðum.

7. Breyta myndbandsspólunum í DVD
Unnið er að útgáfu myndbandsins um íslenska fjárhundinn á DVD en Guðni vinnur að málinu fyrir HRFÍ

8. Plaköt (dúkar) með myndum af íslenskum fjárhundum
Guðni sýnir nokkrar tillögur að plakötum. Umræður um plakötin, myndirnar, textann og leturgerður.

9. Erfðir lita
Rætt um erfðir lita hjá íslenska fjárhundinum

10. ISAA og ræktunarmarkmið íslenska fjárhundsins

11. Afmælissýning
Rætt um deildarsýningu á næsta ári og mögulega útisýningu næsta sumar.

Fundi slitið 23:40

Stjórnarfundur deildar íslenska fjárhundsins
Mánudagur 19. janúar 2009 kl. 20:20

Allir stjórnarmenn DÍF mættir auk Guðrúnar Guðjohnsen sem situr í nefnd HRFÍ sem vinnur að skýringum á ræktunarmarkmiði íslenska fjárhundsins

Dagskrá fundarins:

1. Skýringar á ræktunarmarkmiði íslenska fjárhundsins
Rætt um skýringarnar og vinnu nefndarinnar.

Fundi slitið 23:30

Stjórnarfundur deildar íslenska fjárhundsins
Þriðjudagur 3. febrúar 2009 kl. 20.00

Allir stjórnarmenn mættir

Dagskrá fundarins:

1. Skýringar á ræktunarmarkmiði ísilenska fjárhundsins
Rætt um skýringarnar og vinnu nefndarinnar.

2. ISIC – By-laws fundur á Geysi 6.-8. mars
Guðni kemst ekki á fundinn og kannar hvort aðrir stjórnarmenn komist. Á fundinum verða Guðrún Guðjohnsen og Hans-Åke Sperne frá ISIC/C auk Jan Erikson frá Svíþjóð og Svend Brandt Jensen frá Danmörku

3. DNA -sýnataka

Fundi slitið 23:25

Fundur með nefnd HRFÍ sem vinnur að skýringum á ræktunarmarkmiði íslenska fjárhundsins
Mánudagur 23. febrúar og þriðjudagur 24. febrúar 2009 kl. 13:30

Allir stjórnarmenn DÍF mættir fyrir utan Elís E. Stefánsson sem hefur boðað forföll

Fulltrúar HRFÍ: Jóna Th. Viðarsdóttir og Guðríður Valgeirsdóttir

Nefnd sem vinur að skýringum á ræktunarmarkmiði íslenska fjárhundsins: Guðrún R. Guðjohnsen, Hans-Åke Sperne og Kenneth Edh.

Dagskrá fundarins:

1. Skýringar á ræktunarmarkmiði ísilenska fjárhundsins og vinna nefndarinnar
Rætt um skýringarnar og vinnu nefndarinnar. 

Stjórnarfundur deildar íslenska fjárhundsins
Sunnudagur 15. mars 2009 kl. 20:00

Allir stjórnarmenn DÍF mættir

Dagskrá fundarins

1. Fundur með stýrihópi skapgerðarmats HRFÍ
Stýrihópur skapgerðarmats HRFÍ boðaði stjórn DÍF á sinn fund 16. febrúar sl. og sóttu Helga og Þorsteinn fundinn fyrir DÍF. Efni fundarins var framtíð skapgerðarmats innan HRFÍ en sl. sumar varð að aflýsa skapgerðarmati því það vantar áhugasama aðila til starfa við matið. Rætt var almennt um skapgerðarmatið en eins og staðan er í dag er óvíst hvort hægt verður að bjóða upp á skapgerðarmat í sumar.

2. Ræktunarmarkmið íslenska fjárhundsins og skýringar á því

3. Aðalfundur DÍF
Rætt um aðalfund deildarinnar. 30 ára afmæli deildarinnar er í ár og Guðni stingur upp á að deildin kaupi köku í tilefni tímamótanna og bjóði fundargestum upp á og er það samþykkt. Ágúst tekur að sér að panta tertu. Guðni stingur upp á að aðalfundurinn verði haldin á skrifstofu HRFÍ og er það samþykkt. Helga mun athuga hvenær skrifstofa HRFÍ sé laus. 

Ákveðið að lýsa eftir fólki í bæði básanefnd og göngunefnd á aðalfundi.

4. Deildarsýning 2009
Rætt um mögulega deildarsýningu í sumar

5. Undanþáguskráning á tík
Rætt um möguleika á að láta 3 dómara skoða tíkina á afmælissýningu HRFÍ í ágúst.

6. Ráðstefna ISIC á Íslandi næsta haust
Rætt um ráðstefnu ISIC sem halda á hér á landi næsta haust. Rætt um mögulega staðsetningu og jafnvel mögulega deildarsýningu á sunnudegi. E.t.v. væri hægt að hafa ráðstefnuna á skrifstofu HRFÍ en það er hótel í Síðumúlanum sem e.t.v. gæti hentað.

7. Bréf til HRFÍ v/nefndar ISIC um skapgerðarmat
Á síðustu ISIC ráðstefnu var ákveðið að leita eftir styrk frá HRFÍ svo nefnd ISIC um skapgerðarmatið gæti komið saman á Íslandi og unnið að óskaprófíl fyrir skapgerðarmat á íslenskum fjárhundum. Í nefndinni sitja Ulla Sonne frá Danmörku, May Britt Sannerholt frá Svíþjóð auk Þorsteins. Ef áhugi er fyrir hendi hjá stýrihópi skapgerðarmats HRFÍ gæti stýrihópurinn einnig tekið þátt í þessari vinnu. Ákveðið að skrifa HRFÍ vegna þessa.

8. Health Breed Profile hjá VísAgria á Íslandi?
Agria í Svíþjóð er búið að gera Health Breed Profile fyrir öll hundakyn. Niðurstaðan er að íslenski hundurinn hefur sömu sjúkdóma og hundar almennt, þ.e. þetta er mjög heilbrigð tegund. Á ráðstefnu ISIC sl. haust var talað um að reynt yrði að gera sambærilega könnun í hverju landi fyrir sig. Ákveðið að senda fyrirspurn á VísAgría varðandi málið.

Fundi slitið 23:56

Stjórnarfundur deildar íslenska fjárhundsins
Sunnudagur 24. mars 2009 kl. 20:00

Allir stjórnarmenn mættir

Dagskrá fundarins:

1. Aðalfundur 6. apríl 2009
Guðni hefur talað við Hrund Hjaltadóttur og er hún reiðubúin til að taka að sér fundarstjórn og Þorsteinn er tilbúin til að skrifa fundargerð fundarins. Ágúst mun panta 50 manna tertu fyrir DÍF með áletruninni DÍF 30 ára.

Rætt hvort fá skuli einhvern til að kynna eitthvað áhugavert, m.a. stungið upp á að reyna að fá Albert Steingrímsson til að kynna sporþjálfun og tekur Guðni að sér að tala við hann.

2. Tillaga frá félagsmanni um sérstaka skráningu fyrir afkvæmi hunda með arfgenga starblindu
Tillagan gengur út á að hægt verði að skrá afkvæmi hunda í ræktunarbanni í ættbók með sérstakri skráningu. Búið er að sækja um ræktunarbann á hunda með arfgenga starblindu og því getur DÍF ekki sótt um undanþágu frá reglunni til HRFÍ. 

3. Ræktunarmarkmið - skýringarvinna
Rætt um tillögu nefndarinnar sem vinnur að skýringum á ræktunarmarkmiði íslenska fjárhundsins.

Fundi slitið 00:42

Fundur með formanni HRFÍ
Miðvikudagur 1. apríl 2009 kl. 18:30

Mættir: 
Allir stjórnarmenn DÍF mættir fyrir utan Ágúst Ágústsson sem hefur boðað forföll
Jóna Th. Viðarsdóttir formaður HRFÍ
Guðríður Valgeirsdóttir varaformaður HRFÍ

Dagskrá fundarins:

1. Ræktunarmarkmið íslenska fjárhundsins

Fundi slitið 19:20

________________________________________________________________________
Best er að skoða þessar síður í 1024x768 pixels upplausn. Umsjónarmaður vefs.
© 2006-2010 Deild íslenska fjárhundsins. Afritun óheimil án leyfis. Allur réttur áskilin