Dr. Per-Erik Sundgren á Íslandi 12. maí!

Fyrirlestur um hundarækt, ræktun lítilla stofna
og íslenska fjárhundinn!  

Myndir: Ágúst Ágústsson
Myndir: Elís Stefánsson

Þann 12. maí n.k. mun sænski erfðafræðingurinn Dr. Per-Erik Sundgren halda fyrirlestur í íþróttahúsinu að Ásvöllum í Hafnarfirði um hundarækt, ræktun lítilla stofna og íslenska fjárhundinn.

Hér er um að ræða einstakt tækifæri sem enginn áhugamaður um hundarækt ætti að láta fram hjá sér fara. Sérstök athygli er vakin á því að efni fyrirlestrarins á erindi við alla, óháð því hve mikinn áhuga fólk hefur á íslenska fjárhundinum. Fyrir áhugafólk um íslenska fjárhundinn er fyrirlesturinn þó sérstaklega áhugaverður því Per-Erik hefur gert mjög áhugaverða og nauðsynlega útreikninga á stofni íslenska fjárhundsins.

Fyrirlesturinn hefst kl. 11.00 laugardaginn 12. maí og stendur í 4 klst. Í hádegishléi verður hægt að kaupa súpu á staðnum en gjald fyrir fyrirlesturinn er kr. 3.500. Skráning fer fram hjá HRFÍ, hrfi@hrfi.is . Greiðsla verður að fylgja skráningu en skráningarfrestur rennur út á hádegi 11. maí.

Fyrirlesturinn mun fara fram á ensku.

Dagskrá:

1. Grunn lögmál við ræktun
   Grunn lögmál við náttúruval og það hvernig erfðir eru byggðar upp til að viðhalda erfðabreytileika, svo fremi sem farið sé eftir grunn lögmálum ræktunar
   
2. Ræktun lítilla stofna
   Afleiðingar ræktunar í litlum lokuðum stofnum og áhrif á erfðabreytileika og heilbrigði. Einnig verður fjallað um það hvað hægt sé að gera til að lágmarka tap á erfðabreytileika
   
3. Greining á stofni íslenska fjárhundsins
   Greiningar unnar út frá gagnagrunni ISIC á stofni íslenska fjárhundsins kynntar.
   
4. Tillögur varðandi ræktun íslenska fjárhundsins
   Samantekt á greiningum á stofni íslenska fjárhundsins og þeim niðurstöðum sem komu í ljós. Ráðleggingar Per-Eriks og uppástungur varðandi framtíð íslenska fjárhundsins og varðveislu kynsins
   
5. Umræður

Gert er ráð fyrir 3 klst samtals í liði 1, 2 og 3 og samtals 1 klst í liði 4 og 5.  

Um Dr. Per-Erik Sundgren

Dr. Per-Erik Sundgren er fyrrverandi prófessor við dýrarækar- og erfðafræðideild Sænska landbúnaðarháskólans (Department of Animal Breeding and Genetics við Swedish University of Agricultural Sciences ).

Á árunum 1974-2001 var hann þar í forsvari fyrir hagnýtar rannsóknir á svínarækt og ræktun lítilla dýra. Hann kom af stað rannsóknum á hundarækt við háskólann árið 1974 í samvinnu við Swedish Dog Training Centre. Sænska hundaræktarfélagið (Svensk Kennel Klub) varð síðar félagi að verkefnum er varða erfðabreytileika hundakynja, mjaðmalos, olnbogalos og skapgerð vinnuhunda.

Per-Erik hefur verið stjórnarmaður í Sænska hundaræktarfélaginu og Swedish Dog Training Centre. Hann tekur enn virkan þátt í þróun skapgerðarmats sem víða er notað, m.a. á Íslandi. Í dag hafa yfir 50.000 hundar af meira en 200 kynjum verið metnir, þar af um  12.000 þýskir fjárhundar og 7.000 rottweiler.

Margir kannast við heimasíðu Per-Eriks, www.genetica.se, þar sem m.a. er hægt að nálgast upplýsingar um niðurstöður skapgerðarmats hinna ýmsu hundakynja í Svíþjóð.

________________________________________________________________________
Best er að skoða þessar síður í 1024x768 pixels upplausn. Umsjónarmaður vefs.
© 2006-2010 Deild íslenska fjárhundsins. Afritun óheimil án leyfis. Allur réttur áskilin