Tvær deildarsýningar DÍF 19. og 20. janúar 2008!

Sjá forsíðu um fagnað milli sýninga!

Í fyrsta sinn í sögu deildar íslenska fjárhundsins verða haldnar deildarsýningar tvo daga í röð þar sem tveir frábærir dómarar dæma, þau Sigríður Pétursdóttir og Kenneth Edh.

Sýningarnar verða haldnar  helgina 19.-20. janúar 2008 í Glaðheimum, reiðskemmu Gusts í Kópavogi.

Laugardaginn 19. janúar dæmir Kenneth Edh íslenska fjárhundinn en 67 íslenskir fjárhundar eru skráðir á sýninguna.

Sunnudaginn 20. janúar dæmir Sigríður Pétursdóttir íslenska fjárhundinn en 74 íslenskir fjárhundar eru skráðir á sýninguna.

Sýningin hefst kl. 10.00 báða dagana og gert er ráð fyrir hádegishléi. Sýningartími er ekki sérstaklega áætlaður en reikna má með um 4 mínútum á hund.

Ókeypis er fyrir áhorfendur og er fólki velkomið að mæta með létta stóla og sitja við hringinn. Kalt getur verið í höllinni svo við bendum fólki á að koma vel klætt og taka kaffibrúsann með! 

Sýnendum er bent á að fylgjast vel með dagskránni, það er alfarið á ábyrgð hundeiganda/sýnanda að mæta tímalega við dómhring. Þeir sýnendur sem sýna fleiri en einn hund skulu vera búnir að tryggja sér aðstoð. 
Biðbásar við eina hlið sýningarhrings eru eingöngu fyrir hunda og sýnendur/aðstoðarfólk, en áhorfendum er frjálst að sitja/standa við aðrar hliðar.  

Að gefnu tilefni er rétt að árétta að starfsfólk sýningar mun gera allt sem í þeirra valdi stendur til að halda hreinlæti á svæðinu og vonumst við til að sýnendur geri hið sama. Engin teppi verða í hringjum. Nýjar sýningarreglur er hægt að sjá á vefsíðu Hundaræktarfélags Íslands, www.hrfi.is.

Kenneth Edh hefur dæmt um allan heim og hefur réttindi til að dæma allar hundategundir (allrounder). Hann mun m.a. hljóta þann heiður að velja Besta hund sýningar á Heimssýningunni í Stokkhólmi sumarið 2008.
Kenneth Edh er Íslendingum að góðu kunnur. Hann hefur leiðbeint á ræktendanámskeiðum hér og dæmt nokkrum sinnum áður á hundasýningum hérlendis. Hann dæmdi hér síðast í október s.l. en dæmi þá ekki íslenska fjárhundinn.
Kenneth Edh starfar hjá sænska hundaræktarfélaginu. Hann situr í nefnd fyrir HRFÍ sem vinnur að skýringum á ræktunarmarkmiði íslenska fjárhundsins.

Sigríður Pétursdóttir er einn af stofnendum Hundaræktarfélags Íslands og heiðursfélagi HRFÍ. Hún sat í fyrstu stjórn félagsins, var síðar formaður þess og deildar íslenska fjárhundsins og átti stóran þátt í að koma HRFÍ að sem aukaaðila að alþjóðahundaræktarsamtökunum FCI.
Sigríður vann brautryðjendastarf í ræktun íslenska fjárhundsins sem hún ræktaði áratugum saman undir ræktunarnafninu frá Ólafsvöllum en vandfundinn er sá íslenski fjárhundur sem ekki hefur hunda úr hennar ræktun í ættartrénu. Forseti Íslands sæmdi Sigríði íslensku fálkaorðunni 1. janúar s.l. fyrir störf að ræktun íslenska fjárhundsins. Sigríður ræktar nú dvergszhnauzer og situr í stjórn Schnauzerdeildar HRFÍ.
Auk íslenska fjárhundsins hefur Sigríður nú réttindi til að dæma fjölda tegunda í tegundahópum 1, 2, 5 og 8. Sigríður dæmdi síðast á Íslandi árið 2004 á marssýningu HRFÍ og deildarsýningu DÍF.

Ath: Sýningin er í samstarfi við Schnauzerdeild og Fjár- og hjarðhundadeild og verða því tveir dómhringar í reiðskemmunni á sama tíma báða sýningardagana.

Vonandi sjáum við ykkur sem flest í janúar!

________________________________________________________________________
Best er að skoða þessar síður í 1024x768 pixels upplausn. Umsjónarmaður vefs.
© 2006-2010 Deild íslenska fjárhundsins. Afritun óheimil án leyfis. Allur réttur áskilin